महोत्तरीमा हेविभेट वागी उम्मेदवार थोरै

महोत्तरी समाचारदाता (नागेन्द्रकुमार कर्ण)

महोत्तरी, माघ ८ गते । महोत्तरी जिल्लामा प्रतिनिधिसभा निर्वाचन २०८२ मा वागी उम्मेदवारको संख्या थोरै देखिएको छ । वागी उम्मेदवार थोरै देखिएपनि उनीहरु नतिजाको दिशा मोड्न सक्ने बताइएको छ ।

जिल्लामा रहेको चारवटा क्षेत्रहरु मध्ये क्षेत्रनं. १ र क्षेत्रनं. ३ मा मात्रै हेविभेट वागी उम्मेदवार देखिएको छ । क्षेत्रनं. १ मा राष्ट्रिय स्वतन्त्र पार्टीबाट उम्मेदवारीको चर्चा चलेका विजय पोखरेल अन्तिम समयमा आएर टिकट नपाएपछि स्वतन्त्र उम्मेदवारी दिनुभएको छ । नेपाल पत्रकार महासंघ महोत्तरी शाखाका कार्यसमिति सदस्य तथा सो क्षेत्रमा जेनजी पुस्तावीच रुचाइएका पोखरेललाई पार्टीले अन्तिम समयमा उम्मेदवारीको लागि टिकट नदिएपछि उहाँले वागी भएर स्वतन्त्र रुपमा उम्मेदवारी दर्ता गराउनुभएको हो । राष्ट्रिय स्वतन्त्र पार्टीले क्षेत्रनं. १ मा प्रमोद कुमार महतोलाई उम्मेदवार बनाएको हो ।

त्यसैगरी क्षेत्रनं. ३ मा वागी भएर दुई जनाले स्वतन्त्र रुपमा उम्मेदवारी दर्ता गराउनुभएको छ । जसपाबाट मुख्य उम्मेदवारको रुपमा रहनुभएका तथा पार्टीले प्रत्यक्षतर्फ सिफारिस समेत गर्नुभएका पूर्व कृषि मन्त्री हरिनारायण यादवले स्वतन्त्र रुपमा उम्मेदवारी दर्ता गराउनुभएको छ । जसपा र लोसपाको मिलनपछि बनेको जसपा पार्टीले यसक्षेत्रमा महन्थ ठाकुरकी पुत्री मिनाक्षीलाई उम्मेदवार बनाएपछि हरिनारायण यादवले पार्टीबाट राजिनामा गरि स्वतन्त्र रुपमा उम्मेदवारी दिनुभएको हो । २०७९ को प्रतिनिधिसभा निर्वाचनमा उहाँ महन्थ ठाकुरसँग दुई हजार मतले मात्रै पराजित हुनुभएको थियो ।

उहाँले जसपा नेपालको स्थापनादेखि नै (फोरमदेखि) आफु सो पार्टीमा संलग्न रहेपनि पार्टीले उचित मूल्याँकन नगरेको कारणले आफुले स्वतन्त्र रुपमा उम्मेदवारी दिएको जानकारी दिनुभयो । पार्टीका कार्यकर्ता तथा शुभेच्छुकहरुले साथ दिएपछि आफु निर्वाचनमा उम्मेदवारी दिएको उहाँको कथन थियो ।

त्यसैगरी नेकपा एमालेबाट प्रत्यक्ष तर्फ एकल सिफारिसमा पर्नुभएका रामआधार कापर पनि अन्तिम समयमा पार्टीबाट टिकट नपाएपछि पार्टीबाट वागी भई स्वतन्त्र रुपमा उम्मेदवारी दर्ता गराउनुभएको छ । शुरुदेखि नै आफु उम्मेदवार भई चुनावको तयारीमा रहेपनि पार्टीले अन्तिम समयमा आएर मनोज सिंहलाई पार्टीको टिकट उपलब्ध गराएपछि आफु वागी भएर स्वतन्त्र उम्मेदवारी दिएको रामआधार कापरले बताउनुभयो ।

क्षेत्रनं. ३ मा दुवैको उम्मेदवारीले एमाले तथा जसपा नेपालका उम्मेदवारलाई जितमा संकट देखिन्छ । 

क्षेत्रनं. ४ मा एमालेबाट मुख्य उम्मेदवारको रुपमा रहनुभएका मधेश प्रदेशका निवर्तमान मुख्यमन्त्री सरोजकुमार यादवलाई पार्टीले टिकट नदिएर निलम अधिकारीलाई टिकट दिएको छ । कार्यकर्ताहरुले पार्टीले अन्याय गरेको भन्दै आएपनि सरोज कुमार यादवले आफु प्रदेशसभामै अहिले रहेको र आफ्नो सहमति रहेकोले निलम अधिकारीलाई उम्मेदवारी दिन लगाएको जानकारी दिनुभएको छ ।

महोत्तरी जिल्लामा माघ ६ गते मंगलबार भएको प्रतिनिधिसभा निर्वाचनको लागि महोत्तरीमा रहेको चारवटै क्षेत्रमा १४३ जनाले मनोनयन गराएका छन् । जसमा १९ जना महिला तथा १२४ जना पुरुष रहेको निर्वाचन अधिकृतको कार्यालयले जारी गरेको अन्तिम नामावलीले देखाएको छ । 

महोत्तरी क्षेत्र १ बर्दीबासस्थित निर्वाचन कार्यालयमा दलबाट १३ र स्वतन्त्र १४ गरी २७ उम्मेदवारी दर्ता गराएकोमा २२ पुरुष र पाँच महिला छन् । त्यस्तै क्षेत्र २ बाट १५ दलगत र २२ स्वतन्त्र गरी कुल ३७ जनाको उम्मेदवारी परेकोमा सोमध्ये ३२ पुरुष र पाँच महिला छन् । यता क्षेत्र ३ मा दलबाट १५ र स्वतन्त्र २७ गरी कुल ४२ जनाको उम्मेदवारी परेकोमा ४० पुरुष र दुई महिला छन् । त्यस्तै, क्षेत्र ४ मा दलबाट १३ र स्वतन्त्र उम्मेदवारी २४ गरि ३७ जनाले उम्मेदवारी दर्ता गराएको छ । 

जलेश्वर नगरपालिका वडानं. २ का युवा जितेन्द्र पासवानले महोत्तरीमा वागी उम्मेदवारहरुको संख्या थोरै देखिएपनि नतिजा उलटफेर गर्न सक्ने देखिएको बताउनुभयो । उहाँले वागी उम्मेदवारहरुलाई पार्टीगत रुपमा तथा अन्य रुपमा समेत निष्क्रीयको प्रयासको भइरहेको आफुले बुझेको बताउनुभयो ।

महोत्तरीमा तीन जना बागी उम्मेदवार

तीन टिकट महाविकट

 तीन टिकट महाविकट

नागेन्द्रकुमार कर्ण

महोत्तरी, माघ ७ गते । महोत्तरी जिल्लामा माघ ६ गते मंगलबार उत्साहपूर्वक प्रतिनिधिसभा निर्वाचन २०८२ को मनोनयन दर्ता भएको छ । प्रतिनिधिसभा निर्वाचनको लागि महोत्तरीमा रहेको चारवटै क्षेत्रमा १४३ जनाले मनोनयन गराएका छन् । जसमा २० जना महिला तथा १२३ जना पुरुष रहेको निर्वाचन अधिकृतको कार्यालयले जारी गरेको अन्तिम नामावलीले देखाएको छ ।

जिल्लामा क्षेत्र नं. १ मा पाँच महिला तथा २२ पुरुष गरि २७ जना, क्षेत्रनं. २ मा पाँच महिला र ३२ पुरुष गरि ३७ जना, क्षेत्रनं. ३ मा तिन महिला तथा ३९ पुरुष गरि ४२ जना तथा क्षेत्रनं. ४ मा सात जना महिला र ३० पुरुष गरि ३७ जनाले उम्मेदवारी दिएको देखिएको छ । 

जिल्लाको चारवटै निर्वाचन क्षेत्रमा विगतदेखि नै दोहोरिएका तथा निर्वाचनमा विजयी भएका उम्मेदवारदेखि लिएर नयाँ नयाँ अनुहार भएका पनि उम्मेदवारी दिएका छन् । कतिपय उम्मेदवारहरुले तेस्रोपल्ट पनि लगातार आफ्नो विजयी पताका लहराउन चुनावी मैदानमा आएका छन् । 

जलेश्वर नगरपालिका वडानं. ४ बस्ने पूर्व जिल्ला शिक्षा अधिकारी वयोवृद्ध कृष्णचन्द्र झाले यसवर्ष महोत्तरीको प्रतिनिधिसभाको निर्वाचन रोचक तथा युवा तथा वृद्ध पुस्ताबीचको लडाईको रुपमा रहेको रहेको बताउनुभयो । जेनजी आन्दोलनपछि दुई–दुईपटक जित र हारको अनुभव बोकेका नेताहरू फेरि तेस्रोपटक जनताको ढोका ढकढकयाउनुले उनीहरुको राजनैतिक भविष्य निर्धारण गरिने बताउनुभयो । मैथिलीमा “तीन टिकट महाविकट” उखान रहेको बताउनुहुदै जनताले उनीहरुलाई विगतमा गरेको काम र प्रतिवद्धता अनुसारको व्यवहार हेरेर मत दिने वयोवृद्ध झाको कथन छ । 

ह्याट्रिक गर्न खोज्नेहरुलाई सम्मानजनक जित वा लज्जास्पद हार व्योहोर्नुपर्ने हो त्यो त मतगणनापश्चात नै थाहा होला तर उनीहरुलाई भने सानो तिनो अन्तरको जितले राम्रो भन्न नसकिने देखिन्छ ।

उहाँले उम्मेदवारी दिँदा पहिलो पटक उत्साह, दोश्रोपटक अनुभव भएपनि तेस्रो पटक जनताको भरोसा र अपेक्षाको कडा परिक्षा हुने भएकोले पुरानो नेताहरुलाई सहज नहुने बताउनुभयो । यसवर्षको प्रतिनिधिसभा निर्वाचनमा जेनजी र युवा पुस्ताहरुको लहर देखिएकोले पटक पटक उम्मेदवारी दिने राजनीतिकदलका नेताहरुको लागि विजयी अभियान भने सहज नहुने दावी उहाँको थियो ।

मटिहानी नगरपालिका धिरापुरका युवा सुमन ठाकुरले महोत्तरीमा पटक पटक एउटै उम्मेदवार दोहोरिने गर्दा समस्या देखिएको बताउनुहुदै एउटै व्यक्ति दोहोरिए भने अन्यले कहिल्यै मौका पाउने भन्दै यसमा राजनीतिकदलहरु चुकेको बताउनुभयो । दुई÷दुई पल्ट र सोभन्दा पनि अधिक पटक लडेपनि उम्मेदवारी नछाडने भोक राम्रो नभएको वताउनुहुदै यसमा सचेत हुनुपर्नेमा जोड दिनुभयो ।

जिल्लाको क्षेत्रनं. १ मा नेकपा एमालेको तर्फबाट लक्ष्मी महतो तथा नेकपाको तर्फबाट गिरिराजमणी पोखरेल मनोनयन दर्ता गराउनु भएको छ । २०६४ र २०७० को संविधानसभा निर्वाचन तथा २०७४ को प्रतिनिधि सभा निर्वाचनमा लगातार जित हासिल गरेर पोखरेलले ह्याट्रिक गर्नुभएको थियो । लक्ष्मी महतो तेस्रोपल्ट जनताको भरोसा आफु जित्नेमा ढुक्क हुदै उम्मेदवारी दर्ता गराउनुभएको छ । २०७४ सालको प्रतिनिधिसभा निर्वाचनमा माओवादीको तर्फबाट गिरिराजमणी पोखरेलले लक्ष्मी महतोलाई हराउँदै विजयी हुनुभएको थियो भने २०७९ को प्रतिनिधिसभा निर्वाचनमा लक्ष्मी महतोले गिरिराजमणी पोरखेलसँग हारको वदला लिदैं विजयी हुनुभएको थियो । क्षेत्रनं. १ मा पुनः दुवै जना आफुले गरेको विकास, जनताको चाहनाले उम्मेदवारी दिएको भएपनि यसवर्ष भने दुवैको लागि विजयी अभियान सहज छैन । 

जिल्लाको क्षेत्रनं. २ मा पटक पटक शरतसिंह भण्डारी विजयी हुदै आउनुभएको छ । नेपाली काँग्रेसका किरण यादव पहिलो संविधानसभामा समानुपातिक तर्फकी उम्मेदवार थिइन भने दोश्रो संविधानसभामा प्रत्यक्षतर्फ विजयी भएकी थिइन । २०७४ सालको प्रतिनिधिसभा निर्वाचनमा भने उनी शरतसिंह भण्डारीसँग पराजय भएकी थिइन । यसपाली भने उनी भण्डारीको विजयी रथलाई रोक्दै आफु विजयी हुने दाउँमा छिन् ।

क्षेत्रनं.३ मा प्रतिनिधिसभा निर्वाचनमा दुई÷दुईपल्ट विजयी हुनुभएका महन्थ ठाकुर यसपालि भने आफ्नो पुत्री मिनाक्षी ठाकुरलाई जसपाबाट उम्मेदवारी दर्ता गराउनुभएको छ । दुई पल्ट महन्थ ठाकुरको लागि नेपाली काँग्रेसबाट बलिप्रदान (काँग्रेसले उम्मेदवारी दिए पनि फिर्ता लिने) हुनुभएका बजरंग नेपाली तेस्रोपल्ट पुनः काँग्रेसबाट उम्मेदवारी दिनुभएको छ । ठाकुरमाथि वंशवादको आरोप लागेपनि उहाँले समाजको लागि आफु जेलनेल भोग्दा कोही नआएको बरु छोरी र छोरीज्वाँईले नै साथ दिएकोले आरोप लागेपनि आफु अडिग रहेको बताउनुभएको थियो । त्यसैगरी एमालेका प्रत्यासी रहनुभएका रामआधार कापर अन्तिम समयमा टिकट नपाएर पुनः तेस्रोपल्ट स्वतन्त्रबाट उम्मेदवारी दिनुभएको छ । २०७४ सालमा प्रदेशसभामा उम्मेदवारी, २०७९ सालमा प्रतिनिधिसभामा उम्मेदवारी दिएर हार व्योहोर्नुभएका कापर यसपालि आफु जित्ने भन्दै पुनः उम्मेदवारी दिनुभएको छ । त्यसैगरी पूर्वकृषि मन्त्री हरिनारायण यादव समेत तेस्रोपल्ट जसपाबाट बागी भएर स्वतन्त्र उम्मेदवारको रुपमा उम्मेदवारी दिनुभएको छ ।

क्षेत्रनं. ४ मा नेपाली काँग्रेसका महेन्द्रकुमार राय र जसपाका डा.सुरेन्द्रकुमार यादव तेस्रोपल्ट चुनावी मैदानमा हुनुहुन्छ । २०७४ सालको प्रतिनिधिसभा निर्वाचनमा डा.सुरेन्द्रले महेन्द्रलाई पराजित गर्नुभएको थियो भने २०७९ सालको प्रतिनिधिसभा निर्वाचनमा महेन्द्रले डा.सुरेन्द्रलाई पराजित गरि हारको वदला लिनुभएको थियो । यसवर्षको नतिजा के हुने हो ? मतदाताहरुको मतदानपछि नै थाहा हुनेछ ।

जेनजी आन्दोलनपछि राजनीतिककर्मीहरुलाई अवसर मात्रै होइन चुनौती समेत थपिएको पिपरा गाउँपालिका वडानं. ४ का दिनेश चौधरीले बताउनुभयो । उहाँले जेनजी आन्दोलनपछि युवापुस्ताहरु अनुभवलाई नभई नयाँलाई (युवा) ठाउँ दिनुपर्ने पक्षमा देखिएकोले पनि यसवर्षको नतिजा रोचक तथा अचम्भित हुने दावी गर्नुभयो ।

जनताको मूल्याँकनको आधार यसवर्ष तिन टिकट लिने हुने हो कि उनीहरुको महाविकट युवा पुस्ता हुने हो ? त्यसको उत्तर भने नतिजाबाट मात्रै पाउन सकिने चौधरीको कथन छ । 

ह्याट्रिक गर्ने दाउमा पुराना नेता