जलेश्वर, पुस ५ गते । युनेष्कोले एक कार्यक्रममा महोत्तरी जिल्लाका तिन वरिष्ठ पत्रकारहरुलाई युनेष्को मिडिया एम्बेष्डर घोषणा गरेको छ ।
युनेष्को आमसंचार विभागका संयोजक तथा गोरखापत्र दैनिकका पूर्वप्रधानसम्पादक सीताराम अग्रहरीले महोत्तरी जिल्लाका प्रेस स्वतन्त्रता सेनानी विन्देश्वरी प्रसाद मण्डल, कुँवरकान्त झा तथा वरिष्ठ पत्रकार दशरथ भण्डारीलाई मिडिया ब्राण्ड एम्बेष्डर घोषणा गर्नुभएको हो ।महोत्तरी जिल्लाको सदरमुकाम जलेश्वरमा महोत्तरी, धनुषा र सर्लाहीका संचारकर्मीहरुको लागि युनेष्कोले आयोजना गरेको शान्ति र दिगो विकास कार्यशाला गोष्ठीमा फुलको माला लगाएर उहाँहरुले पत्रकारिताक्षेत्रमा पु¥याएको योगदानको कदरस्वरुप मिडिया ब्राण्ड एम्बेष्डर घोषणा गरिएको संयोजक अग्रहरीले बताउनुभयो । संयोजक अग्रहरीले यस्ता कार्यक्रमहरुले शान्ति तथा सदभाव बढाउनेमा सहयोग पुग्ने अपेक्षा समेत राख्नुभएको थियो । उहाँले यस्ता कार्यक्रमहरु विभिन्न जिल्लामा समेत गरिने वताउनुभएको थियो ।
ब्राण्ड एम्बेष्डर बन्नुभएका तिनजना वरिष्ठ पत्रकारहरुलाई मधेशवाणी साप्ताहिकका सम्पादक राजेश अहिराज, कान्तिपुरका पत्रकार दिनेश यादव, युनेष्कोका भरतराज त्रिपाठी, पदमराज जोशीसहितकाहरुले फुलमालाले स्वागतसहित धन्यवाद दिनुभएको थियो ।
कार्यक्रममा प्रशिक्षक रहनुभएका मधेशवाणीका सम्पादक अहिराजले आफुले तालिममा प्रशिक्षण गरेवाप्त पाएको पारिश्रमिक नेपाल पत्रकार महासंघ महोत्तरी शाखाका सभापति ईश्वरी पौडेललाई हस्तान्तरण गर्नुभएको थियो ।
उहाँले महोत्तरीका संचारकर्मीहरुको लगनशिलता तथा महोत्तरीको संचारक्षेत्रको सानो भएपनि विकासको लागि सहयोग हस्तान्तरण गर्नुभएको थियो ।
सो अवसरमा सभापति पौडेलले सम्पादक अहिराजबाट पाएको रकम तथा अन्य रकमहरु जुटाएर स्व.युवा पत्रकार कञ्चन भण्डारी तथा स्व.वयोवृद्ध पत्रकार रामस्वार्थ सिंहको नाममा पत्रकारिता पुरस्कार स्थापना गर्ने घोषणा गर्नुभएको थियो ।
उहाँले जनकपुर अञ्चलमा संचारक्षेत्रमा काम गर्ने युवाहरुलाई कञ्चन भण्डारी युवा पत्रकारिता पुरस्कार तथा वरिष्ठ पत्रकारहरुलाई रामस्वार्थ सिंह पत्रकारिता पुरस्कारबाट हरेक वर्ष सम्मानित गर्ने जानकारी दिनुभएको थियो ।
सो अवसरमा महासंघले ४ महिना लामो बन्द पश्चात पनि जलेश्वरमा तिन जिल्लाका संचारकर्मीहरुको लागि कार्यक्रम आयोजना गरेकोमा आयोजकसहित प्रशिक्षक, अतिथीहरुलाई दोसल्ला ओढाएर सम्मान गरेको थियो ।
