दर्जनौ विद्यालयका हजारौ विद्यार्थी सडकमा

महोत्तरी समाचारदाता
जलेश्वर, मङ्सिर १८ गते । विद्यार्थीको पढन पाउनुपर्ने अधिकार रक्षाको लागि महोत्तरीका सदरमुकाम जलेश्वरबाट पूर्व रहेका दर्जनौ गाउँका विद्यार्थीहरु सडकमा उत्रेर मानव साँगलो बनाएर शुक्रबार विहान प्रर्दशन गरेका छन् ।

धनुषा जिल्लाको कोल्हुवा, तुल्सीयाहीसहित महोत्तरीका मटिहानी, पर्सापतैली, सिमरदही गाउँविकास समिति सहित जलेश्वर नगरपालिकामा हालै गाभिन पुगेका सुगामा रहेको विद्यालयका विद्यार्थी विहानैदेखि सडकमा जम्मा भएर मानव साँगलो बनाएर विद्यार्थी शान्ति क्षेत्र हो भन्दै प्रर्दशन गरेका थिए ।
विहानको वाक्लो चिसो र सिरेटोको प्रवाह नै नगरी सामुदायिक तथा निजी विद्यालयका विद्यार्थीहरुले ११ किलोमिटर लामो मानव साँगलो बनाएको सुगास्थित चिल्ड्रेन्स पाराडाइज इ.बो.स्कुलका फाउण्डर शम्भु ठाकुरले जानकारी दिनुभयो ।

विद्यार्थीको पढन पाउनुपर्ने हकको सुनिश्चितता, मधेश आन्दोलन सम्बोधन गरि विद्यार्थीको पढन पाउने वातावरण निर्माण लगायतका नारा सहित विद्यार्थीहरुले एकतर्फीरुपमा मानव साँगलो बनाएर प्रर्दशन गरेका हुन् ।
विहिवार मात्रै महोत्तरी जिल्लाको विभिन्न गाउँ विकास समितिमा प्याबसन महोत्तरीको निर्णयमा मानव साँगलो बनाएर प्रर्दशन गरिएको थियो । हामी विहिवारको सांगलो देखेर निक्कै प्रभावित भयौ र विद्यार्थीको अधिकार सुनिश्चितताको लागि हामीले पनि सांगलो निर्माण गर्नुपर्छ भन्दै स्वस्फुर्तरुपमा आज सांगलो निर्माण गरेको एक शिक्षकले कुराकानीमा जानकारी दिनुभयो ।

साँगलोमा धनुषाको कोल्हुवास्थित श्री वैजनाथ देवनारायण जनता माध्यमिक विद्यालय, मटिहानीको श्रीराम उ.मा.वि, नेपाल संस्कृत विश्व विद्यालय अन्तर्गत रहेको लक्ष्मीनारायण विद्यापीठ, राजकिय संस्कृत मावि, ,मा.वि.सुगा, चिल्ड्रेन्स पाराडाईज, ल.च.मु.उ.मा.वि. जलेश्वर ,महेन्द्र उ.मा.वि जलेश्वर, गणेश प्राथमिक विद्यालय लगायतका दर्जनौ विद्यालयको विद्यार्थी तथा शिक्षक, शिक्षिकाहरुको सहभागिता रहेको थियो ।